കദീജുമ്മയ്ക്ക് തുണയായി കെഎസ്ഇബി എൻജിനീയേഴ്സ് അസോസിയേഷൻ; പാതിവഴിയിലായ വീടിന് മുകളിലെ വൈദ്യുതി ലൈൻ മാറ്റി സ്ഥാപിച്ചു

കുമ്പള(www.truenewsmalayalam.com) : കുമ്പള ബദ്രിയാ നഗറിലെ വിധവയായ ഖദീജുമ്മയ്ക്ക് തുണയായി കെഎസ്ഇബി എഞ്ചിനീയേഴ്സ് അസോസിയേഷൻ. പഞ്ചായത്ത് ഫണ്ട് ഉപയോഗപ്പെടുത്തി നിർമ്മിക്കുന്ന വീടിന് മുകളിൽ വൈദ്യുതി ലൈൻ ഉള്ളതിനാൽ കഴിഞ്ഞ അഞ്ചുവർഷത്തോളമായി ഖദീജുമ്മയുടെ വീട് പണി പാതിവഴിയിൽ മുടങ്ങിക്കിടക്കുകയായിരുന്നു. 

ഇത് പത്രമാധ്യമങ്ങളിൽ വാർത്തയായതോടെ ഖദീജുമ്മയ്ക്ക് വൈദ്യുതി പോസ്റ്റ് മാറ്റി നൽകാൻ കെഎസ്ഇബി എഞ്ചിനീയർസ് അസോസിയേഷൻ തീരുമാനിക്കുകയായിരുന്നു.

അംഗങ്ങളിൽ നിന്ന് സ്വരൂപിച്ചടുത്ത 15,000 രൂപ ചെലവഴിച്ചാണ് വൈദ്യുതി ലൈൻ ഇപ്പോൾ മാറ്റി സ്ഥാപിച്ചിരിക്കുന്നത്.

 2019-20 വാർഷിക ലൈഫ് മിഷൻ ഭവന പദ്ധതിയിൽ ഉൾപ്പെടുത്തി കുമ്പള ഗ്രാമപഞ്ചായത്താണ് കദീജുമ്മയ്ക്ക് കുമ്പള നായികാപ്പ് ശിവാജി നഗറിൽ സർക്കാരിൽ നിന്ന് ലഭിച്ച ഭൂമിയിൽ വീട് നിർമ്മാണത്തിനായുള്ള ഫണ്ട് അനുവദിച്ചത്.

 വീടുപണി പകുതിയായപ്പോഴാണ് ഖദീജുമ്മയുടെ വീട് എന്ന സ്വപ്നത്തിന് വൈദ്യുതി ലൈൻ തടസ്സമായി നിന്നത്. പിന്നീട് വൈദ്യുതി ലൈൻ മാറ്റിസ്ഥാപിക്കാൻ വേണ്ടി കദീജുമ്മ കെഎസ്ഇബി- പഞ്ചായത്ത് ഓഫീസുകൾ കയറിയിറങ്ങുകയായിരുന്നു പരാതിയുമായി ഇക്കാലമത്രയും.

 സ്വന്തം ചെലവിൽ വൈദ്യുതി പോസ്റ്റ് മാറ്റിസ്ഥാപിക്കാനുള്ള സാമ്പത്തികശേഷി വിധവയായ ഖദീജുമ്മയ്ക്കുണ്ടായിരുന്നില്ല. കൂലി വേല ചെയ്താണ് കുടുംബം പോറ്റുന്നത്. ഇപ്പോൾ ബദ്രിയാ നഗറിൽ വാടക കെട്ടിടത്തിലാണ് താമസവും.

 പത്രവാർത്ത ശ്രദ്ധയിൽപ്പെട്ട  അസോസിയേഷൻ ജില്ലാ പ്രസിഡണ്ട് നാഗരാജ് ഭട്ടിന്റെ നേതൃത്വത്തിൽ സ്ഥലം സന്ദർശിക്കുകയും, അസോസിയേഷൻ ഇടപെട്ട് പ്രശ്നം പരിഹരിക്കുകയും ചെയ്തത്.

 കാസർഗോഡ് സബ് ഡിവിഷനൽ അസിസ്റ്റന്റ് എക്സിക്യൂട്ടീവ് എഞ്ചിനീയർ രവീന്ദ്രൻ, സെക്ഷൻ അസിസ്റ്റന്റ് എൻജിനീയർ സുമിത്രൻ, സബ് എൻജിനീയർ സബ് നാദേവ് എന്നിവരാണ് നേതൃത്വം നൽകിയത്. 

കോൺട്രാക്ടർ ദിനേശൻ പണിക്കൂലി പോലും വാങ്ങാതെ ബന്ധപ്പെട്ട പ്രവർത്തികൾ ചെയ്തു കൊടുത്തു. യൂണിറ്റ് സെക്രട്ടറി അബ്ദുൽ ഖാദർ സി എച്ച്, ട്രഷറർ സുബിലാഷ് കുമാർ, കേന്ദ്ര ഭാരവാഹി സജിത് കുമാർ തുടങ്ങിയവരും സന്നിഹിതരായിരുന്നു.

 ഖദീജുമ്മയുടെ ദുരിതം കണ്ടറിഞ്ഞ് സഹായിക്കാൻ കെഎസ്ഇബി എൻജിനീയേർസ് അസോസിയേഷൻ തയ്യാറായതോടെ ഇനി ഭവന പദ്ധതിയിലെ ബാക്കി തുക കുമ്പള ഗ്രാമ പഞ്ചായത്ത് നൽകിയാൽ മാത്രമേ വീടെന്ന സ്വപ്നം യാഥാർത്ഥ്യമാവുകയുള്ളൂ.അതിന് ഇനി തടസ്സങ്ങൾ നീക്കി പഞ്ചായത്ത് കനിയണമെന്നാണ് ഖദീജയുടെ ആവശ്യം.