കുമ്പളയിലെ ആദ്യത്തെ സർക്കാർ ടൂറിസം പദ്ധതി"കിദൂർ പക്ഷി ഗ്രാമം''ഒരുങ്ങി.

കുമ്പള.പക്ഷി നിരീക്ഷണത്തിനും, ഗവേഷണത്തിനുമായി കുമ്പള ഗ്രാമപഞ്ചായത്തിലെ കിദൂർ കുണ്ടങ്കരടുക്കയിൽ സംസ്ഥാന സർക്കാരിന്റെ ഡോർമിട്രി പക്ഷി ഗ്രാമം പദ്ധതി നിർമ്മാണം പൂർത്തിയായി.

 പ്രകൃതിസ്നേഹികൾക്ക് ഇനി കിദൂർ കുണ്ടങ്കരുടുക്കയിലെ ത്തിയാൽ പക്ഷി ഗ്രാമത്തിൽ താമസിക്കാം.സംസ്ഥാന സർക്കാരിന്റെ വിനോദസഞ്ചാര വകുപ്പിന്റേതാണ് പക്ഷി ഗ്രാമം പദ്ധതി.കുമ്പള ഗ്രാമപഞ്ചായത്തിൽ നടപ്പാക്കുന്ന ആദ്യത്തെ സർക്കാർ ടൂറിസം പദ്ധതി കൂടിയാണിത്. നടത്തിപ്പിനായി ടെണ്ടർ നടപടികൾ പൂർത്തിയായാൽ കെട്ടിടം തുറന്നു കൊടുക്കും. ഉദ്ഘാടനത്തിന് മന്ത്രിമാരുമെത്തും.

 2019ൽ കാസർഗോഡ് വികസന പാക്കേജിൽ ഉൾപ്പെടുത്തി 60 ലക്ഷം രൂപ ചെലവഴിച്ചാണ് പക്ഷി ഗ്രാമത്തിന്റെ ഡോർമിട്രി നിർമ്മാണം പൂർത്തിയാക്കിയിരിക്കുന്നത്.ജില്ല നിർമ്മിതി കേന്ദ്രത്തിലായിരുന്നു നിർമ്മാണ ചുമതല. നിർമ്മാണത്തിലുണ്ടായ കാലതാമസം വലിയ പ്രതിഷേധങ്ങൾക്കിടയാക്കിയിരുന്നു.

 കെട്ടിടത്തിൽ മീറ്റിംഗ് ഹാൾ,ഓഫീസ് മുറി, കാബിൻ, താമസത്തിനായുള്ള മുറികൾ,അടുക്കള, ശൗചാലയങ്ങൾ എന്നിവയെല്ലാം ഒരുക്കിയിട്ടുണ്ട്.പ്രകൃതി രമണീയമായ ഈ പ്രദേശത്ത് ഇനി ടൂറിസം സഞ്ചാരികൾ കൂടി എത്തിത്തുടങ്ങുമെന്ന പ്രതീക്ഷയിലാണ് അധിക്രതർ.

 കിദൂർ കുണ്ടങ്കരടുക്ക പക്ഷി ഗ്രാമം 10 ഏക്കർ വിസ്തൃതിയിലു ള്ളതാണ്.ഈ ഗ്രാമം ജൈവവൈവിധ്യങ്ങളാൽ സമ്പന്നവുമാ ണ്.വിദേശത്തേയും, സ്വദേശത്തേയുമായി 174  വ്യത്യസ്തയിനം പക്ഷികളെ ഇതുവരെയായി ഇവിടെ പക്ഷി നിരീക്ഷകർ കണ്ടെത്തിയിട്ടുണ്ട്. ഇതിനായുള്ള കൂടുതൽ ഗവേഷണങ്ങളും നടന്നു വരുന്നുണ്ട്. അപൂർവയിനം പക്ഷികൾ കിദൂറിന്റെ ആകർഷണമാണെന്ന് പക്ഷി നിരീക്ഷകർ പറയുന്നു.
ഏത് വേനലിലും വറ്റാത്ത പ്രകൃതിദത്തമായ "കാജൂർ പള്ളം'' കിദൂറിന്റെ മാത്രം പ്രത്യേകതയാണ്. ആവശ്യത്തിന് വെള്ളം കിട്ടുന്നതിനാലാകാം പക്ഷികൾ ഇവിടെ എത്തുന്നതെന്നാണ് പക്ഷി നിരീക്ഷകരുടെ അഭിപ്രായം.

 കിദൂരിൽ താമസസ്ഥലം ഒരുക്കിയതോടെ പക്ഷി ഗ്രാമത്തിലേക്ക് കൂടുതൽ പക്ഷി നിരീക്ഷകരും, ഗവേഷകരും, വിദ്യാർത്ഥികളും, ടൂറിസ്റ്റുകളും എത്തുമെന്ന പ്രതീക്ഷയും നാട്ടുകാർക്കുണ്ട്.പദ്ധതി ഉദ്ഘാടനത്തിന് ഒരുങ്ങുന്നതോടെ തൊട്ടടുത്ത കുമ്പളയിലെ ആരിക്കാടി കോട്ട, കുമ്പള തടാക ക്ഷേത്രം തുടങ്ങിയ സ്ഥലങ്ങളും ടൂറിസം സാധ്യതകൾക്ക് സാഹചര്യമൊരുങ്ങുമെന്നും നാട്ടുകാർ പ്രതീക്ഷിക്കുന്നുണ്ട്.