കോയിപ്പാടി മത്സ്യ ഗ്രാമത്തിലെ ആരോഗ്യ ഉപ കേന്ദ്രം പ്രവർത്തനസജ്ജമാക്കണം; കുമ്പള ഗ്രാമപഞ്ചായത്ത് ചെയർപേഴ്സൺ സബൂറ

കുമ്പള(www.truenewsmalayalam.com) : കുമ്പളയിൽ കടലോര മേഖലയിൽ അനുവദിച്ച ആരോഗ്യ ഉപ കേന്ദ്രം പ്രവർത്തനസജ്ജമാക്കാൻ നടപടി സ്വീകരിക്കണമെന്ന് വാർഡ് മെമ്പറും, കുമ്പള ഗ്രാമപഞ്ചായത്ത് ചെയർപേഴ്സയുമായ സബൂറ ആരോഗ്യവകുപ്പ് അധികൃതർക്ക് നൽകിയ നിവേദനത്തിൽ ആവശ്യപ്പെട്ടു.

കുമ്പള കോയിപ്പാടി കടപ്പുറം ഫിഷറീസ് മേഖലയിൽ കഴിഞ്ഞ ഏഴ് വർഷം മുമ്പ് അനുവദിച്ച ആരോഗ്യ ഉപ കേന്ദ്രം ഇപ്പോഴും നോക്കുകുത്തിയായി നിലനിൽക്കുന്നു.

തീരദേശ വികസന കോർപ്പറേഷൻ ലക്ഷങ്ങൾ ചെലവഴിച്ചു നിർമ്മിച്ച കുമ്പള ഗ്രാമപഞ്ചായത്തിന്റെ കീഴിലുള്ള ആരോഗ്യ ഉപ കേന്ദ്രമാണ് അവഗണന നേരിടുന്നത്.ഇത് സംബന്ധിച്ച് നേരത്തെ നിരവധി പരാതികളും, നിവേദനങ്ങളും പഞ്ചായത്ത് മുഖേന ബന്ധപ്പെട്ടവർക്ക് നൽകിയതുമാണ്.എന്നാൽ ബന്ധപ്പെട്ടവർ നടപടി സ്വീകരിക്കുന്നില്ലെന്നാണ് ആക്ഷേപം.

 കെട്ടിടത്തിന്റെ ഒരു മുറിയിൽ പഞ്ചായത്ത് ഇടപെട്ട് കുറച്ചു പുസ്തകങ്ങളും മറ്റും ലഭ്യമാക്കി ലൈബ്രറി പ്രവർത്തനം ആരംഭിച്ചത് മാത്രം മിച്ചം.പിന്നീട് സന്നദ്ധ സംഘടനകളും മറ്റും കെട്ടിടത്തിൽ മെഡിക്കൽ ക്യാമ്പുകളും മറ്റും നടത്തിവരുന്നുണ്ട്.എന്നാൽ ആരോഗ്യകേന്ദ്രം തുറന്നു പ്രവർത്തിക്കാൻ ആവശ്യമായ നടപടികൾ ഉണ്ടാകുന്നില്ല. 

വർഷങ്ങളായി കെട്ടിടം അടഞ്ഞു തന്നെ കിടക്കുന്നതിനാൽ ഇപ്പോൾ തകർച്ചാ ഭീഷണിയും നേരിടുന്നുണ്ട്. വാതിലുകളും ജനാലകളും തുരുമ്പെടുക്കാൻ തുടങ്ങിയിട്ടുണ്ട്. ഇടയ്ക്കിടെ കുമ്പള ഗ്രാമപഞ്ചായത്ത് അറ്റകുറ്റപണികൾ നടത്താൻ വാർഷിക പദ്ധതികളിൽ ഇതിനായി ഫണ്ട് നീക്കിവെക്കുന്നുമുണ്ട്.

 ഡോക്ടർമാർ ഉൾപ്പെടെയുള്ള ആരോഗ്യ ഉപകേന്ദ്രം ഈ തീരപ്രദേശത്ത് അനിവാര്യമാണ്. അതിനായാണ് പദ്ധതി കൊണ്ടുവന്നതും. മത്സ്യത്തൊഴിലാളികൾ തിങ്ങിപ്പാർക്കുന്ന ഈ മേഖലയിൽ അസുഖം വന്നാൽ ആശുപത്രിയിൽ ചെല്ലണമെങ്കിൽ കുമ്പള സാമൂഹികാ രോഗ്യ കേന്ദ്രത്തെ സമീപിക്കണം.

ഇവിടെ ബസ് ഗതാഗതസൗകര്യം ഒന്നുമില്ല. അതുകൊണ്ടുതന്നെ കുട്ടികളും, പ്രായമായവരും ഇത് മൂലം ഏറെ പ്രയാസപ്പെടുന്നു. ഓട്ടോ പിടിച്ചു പോകണമെങ്കിൽ വലിയ വാടക നൽകേണ്ടതുമുണ്ട്. ഇത് പ്രദേശവാസികൾക്ക് സാമ്പത്തിക പ്രയാസവും ഉണ്ടാക്കുന്നുണ്ട്.

 ആരോഗ്യ ഉപ കേന്ദ്രത്തിൽ ജീവനക്കാരെയും, അടിസ്ഥാന സൗകര്യവും ഒരുക്കേണ്ടത് ആരോഗ്യ വകുപ്പ് ജില്ലാ അധികാരികളാണ്. നിരവധിതവണ ജനപ്രതിനിധികളും കുമ്പള ഗ്രാമപഞ്ചായത്ത് ഭരണസമിതിയും ജില്ലാ മെഡിക്കൽ ഓഫീസറെ കണ്ട് നിവേദനം നൽകിയിരുന്നുവെങ്കിലും തുടർനടപടികൾ ഉണ്ടായിട്ടില്ല. ആയതിനാൽ ആരോഗ്യ കേന്ദ്രം  പ്രവർത്തനസജ്ജമാക്കാൻ അടിയന്തര നടപടി സ്വീകരിക്കണമെന്ന് കുമ്പള ഗ്രാമപഞ്ചായത്ത് ചെയർപേഴ്സൺ സബൂറ നിവേദനത്തിൽ  ആവശ്യപ്പെട്ടു.

ഇത് സംബന്ധിച്ച് നേരത്തെ സബൂറ താലൂക്ക് തല അദാലത്തിലും പരാതി നൽകിയിരുന്നു.