കുട്ടികൾക്ക് നവ്യാനുഭവം പകർന്ന് മാഗസിൻ നിർമ്മാണ മത്സരം

ബദിയടുക്ക(www.truenewsmalayalam.com) : കേരള അറബി ടീച്ചേഴ്സ് ഫെഡറേഷൻ (കെ.എ.ടി.എഫ്.)  കുമ്പള ഉപജില്ലാ കമ്മിറ്റി എ ജെ ബി എസ് ഏൽക്കാന യിൽ സംഘടിപ്പിച്ച അറബിക് സ്പോട്ട് മാഗസിൻ നിർമ്മാണ മത്സരം കുട്ടികൾക്ക് നവ്യാനുഭവം പകർന്നു. 

അന്താരാഷ്ട്ര അറബി ഭാഷ ദിനാചരണത്തിന്റെ ഭാഗമായി എൽപി ,യുപി ,ഹൈസ്കൂൾ ഹയർസെക്കൻഡറി വിഭാഗങ്ങളിൽ അറബി ഭാഷ പഠിക്കുന്ന കുട്ടികൾക്കാണ് മത്സരം സംഘടിപ്പിച്ചത്. 

സ്കൂളുകളിൽ നിന്ന് പഠന പ്രവർത്തനത്തിന്റെ ഭാഗമായി പല മാഗസിനുകളും നിർമ്മിച്ചിട്ടുണ്ട് എങ്കിലും നൽകപ്പെടുന്ന വിഷയത്തിൽ അധിഷ്ഠിതമായി നിശ്ചിതമണിക്കൂറുകൾക്കുള്ളിൽ മാഗസിൻ നിർമ്മിക്കലായിരുന്നു.

പ്രൈമറി വിഭാഗത്തിന് വീട്,  ഗ്രാമം  , തുടങ്ങിയ തീം നൽകിയപ്പോൾ ഹൈസ്കൂൾ ഹയർസെക്കൻഡറി വിഭാഗങ്ങൾക്ക് വയനാട് ദുരന്തം, പൊലോത്ത കാലികമായ വിഷയങ്ങൾ ആയിരുന്നു മാഗസിനിൽ ഉൾപ്പെടുത്താൻ ഉണ്ടായിരുന്നത്. 

ജിജെബി എസ് മുഗു ഹെഡ്മാസ്റ്റർ അബൂബക്കർ ഉദ്ഘാടനം ചെയ്തു.
വിജയികളായ സ്കൂളുകൾക്കുള്ള ട്രോഫിയും കുട്ടികൾക്കുള്ള സർട്ടിഫിക്കറ്റും വിതരണത്തിന് എജെബിഎസ് ഏൽക്കാന ഹെഡ്മാസ്റ്റർ അബ്ദുൽ അസീസ്, മുതിർന്ന അധ്യാപകൻ ഹനീഫ് എന്നിവർ നേതൃത്വം നൽകി. 

കേരള അറബിക് ടീച്ചേഴ്സ് ഫെഡറേഷൻ കുമ്പള ഉപജില്ല പ്രസിഡണ്ട് അബ്ദുൽ സലാം പാടലടുക്ക അധ്യക്ഷത വഹിച്ചു.
 ഷാഹിദ് , മുഹാജിർ,നൗഷാദ് എന്നിവർ പ്രസംഗിച്ചു.

ജനറൽ സെക്രട്ടറി അബ്ദുൽ ജലീൽ സ്വാഗതവും, ഉമൈമ ഷേണി നന്ദിയും പറഞ്ഞു.