മൂസാ ഷരീഫ് നൂറാം അന്താരാഷ്ട്ര റാലി എന്ന റെക്കോർഡിലേക്ക്... ചരിത്ര മുഹൂർത്തത്തിന് സാക്ഷിയാവുന്നത് ആഫ്രിക്കൻ മണ്ണ്.

കാസറഗോഡ് : ഇന്ത്യൻ കാർറാലി ഇതിഹാസം മൂസാ ഷരീഫ്  അപൂർവ റെക്കോർഡിന് അരികിൽ.
നൂറാം അന്താരാഷ്ട്ര റാലിയിൽ മത്സരിക്കുന്ന ആദ്യ ഇന്ത്യൻ താരം എന്ന ബഹുമതി ഇനി മൂസ ഷരീഫിന് സ്വന്തമാകും.
ശനിയാഴ്ച ആഫ്രിക്കയിലെ ടാൻസാനിയയിൽ ആരംഭിക്കുന്ന ആഫ്രിക്കൻ റാലി ചാമ്പ്യൻഷിപ്പിൽ കളത്തിൽ ഇറങ്ങുന്നതോടെയാണ് ഈ നേട്ടം കൈവരിക്കുക.ഇന്ത്യൻ റാലി സർക്യൂട്ടിലെ തന്നെ ഏറ്റവും വലിയ  നാഴികക്കല്ലാണിത്. വിവിധ രാജ്യങ്ങളിൽ നിന്നുള്ള
16 വ്യത്യസ്ത  ഡ്രൈവർമാരുടെ കൂടെ മത്സരിച്ചാണ് ഇന്ത്യയിലെ നമ്പർ വൺ നാവിഗേറ്ററായ മൂസാ ഷരീഫ് ഈ നേട്ടം കൊയ്യുന്നത്. ഇതിനകം 341 റാലികളിൽ മത്സരിച്ച ഷരീഫ് എട്ടുതവണ ദേശീയ കാർറാലി ചാമ്പ്യൻ പട്ടം മാറോടണച്ചിട്ടുണ്ട്.

പ്രശസ്ത ഡ്രൈവർ നവീൻ പുലിഗില്ലയോടൊപ്പം ചേർന്നാണ് ശനിയാഴ്ച ആരംഭിക്കുന്ന ആഫ്രിക്കൻ റാലി ചാമ്പ്യൻഷിപ്പിൽ ഷരീഫ് മത്സരത്തിനിറങ്ങുന്നത്. 320 കിലോമീറ്റർ ദൈർഘ്യമുള്ള 9 സ്പെഷ്യൽ സ്റ്റേജുകൾ അടങ്ങിയ സാഹസികത നിറഞ്ഞ പാതയിലൂടെയുള്ളതാണ് ആഫ്രിക്കൻ കാർ റാലി ചാമ്പ്യൻഷിപ്പ്. നേരത്തെ കെനിയയിൽ നടന്ന സഫാരി റാലിയിൽ ഈ സഖ്യം ജേതാക്കളായിരുന്നു.
തന്റെ നൂറാം അന്താരാഷ്ട്ര റാലിയിൽ വിജയത്തിൽ കുറഞ്ഞൊന്നും പ്രതീക്ഷിക്കുന്നില്ലെന്ന് മൊഗ്രാൽ പെർവാഡ് സ്വദേശിയായ മൂസാ ഷരീഫ് പറയുന്നു.