നൂറാം അന്താരാഷ്ട്ര റാലിയിലും മൂസാ ഷരീഫിന് മിന്നും ജയം

കാസറഗോഡ് : നൂറാം അന്താരാഷ്ട്ര റാലിയിൽ മത്സരിക്കുന്ന ആദ്യ ഇന്ത്യൻ താരം എന്ന അപൂർവ റെക്കോർഡ് സ്ഥാപിച്ച മൂസാ ഷരീഫിന് നൂറാം റാലിയിലും മികച്ച നേട്ടം.

കഴിഞ്ഞദിവസം ആഫ്രിക്കയിലെ ടാൻസാനിയയിൽ സമാപിച്ച ആഫ്രിക്കൻ കാർറാലി ചാമ്പ്യൻഷിപ്പിൽ എ.ആർ. സി-3, എൻ.ആർ.സി-3 വിഭാഗങ്ങളിൽ മൂസാ ഷരീഫ് - നവീൻ പുലിഗില്ല സഖ്യം ജേതാക്കളായി. വിവിധ വിഭാഗങ്ങളിലായി വ്യത്യസ്ത രാജ്യങ്ങളിൽ നിന്നുള്ള 23 ടീമുകൾ മത്സരിച്ച റാലിയിൽ ഓവറോൾ വിഭാഗത്തിൽ ഏഴാം സ്ഥാനവും ഈ ടീം നേടിയിട്ടുണ്ട്.

320 കിലോമീറ്റർ ദൈർഘ്യമുള്ള 9 സ്പെഷ്യൽ സ്റ്റേജുകൾ അടങ്ങിയതും സാഹസികത നിറഞ്ഞ പാതയിലൂടെയുള്ളതുമാ യിരുന്നു ആഫ്രിക്കൻ കാർറാലി ചാമ്പ്യൻഷിപ്പ്. അടുത്തവർഷം ആഫ്രിക്കൻ റാലി ചാമ്പ്യൻഷിപ്പിന്റെ മുഴുവൻ വിഭാഗങ്ങളിലും മത്സരിക്കാൻ ഒരുങ്ങുകയാണ് ഈ സഖ്യം.