വേൾഡ് റാലി ചാമ്പ്യൻഷിപ്പിൽ രണ്ടാം സ്ഥാനം; ഡബ്ല്യു.ആർ.സി 3 വിഭാഗത്തിൽ ചരിത്രപരമായ നേട്ടം കൊയ്യുന്ന ആദ്യ ഇന്ത്യൻ കൂട്ടുകെട്ടായി നവീൻ പുലിഗില്ലയും മൂസാ ഷരീഫും

കാസറഗോഡ്(www.truenewsmalayalam.com) : ഇന്ത്യൻ റാലി ചരിത്രത്തിൽ ഒരു പുതുവഴിത്തിരിവ് സൃഷ്ടിച്ചുകൊണ്ട് സൗദി അറേബ്യ റാലി 2025–ലെ ഡബ്ല്യു.ആർ.സി 3 വിഭാഗത്തിൽ ഹൈദരാബാദിലെ നവീൻ പുലിഗില്ലയും പരിചയസമ്പന്നനായ കോ–ഡ്രൈവർ മൂസ ഷരീഫും രണ്ടാം സ്ഥാനത്ത് ഫിനിഷ് ചെയ്തു.

പോഡിയം ( ആദ്യ മൂന്ന് സ്ഥാനത്ത് ഫിനിഷ് ചെയ്യുന്ന) നേടുന്ന ആദ്യ പൂർണ്ണ ഇന്ത്യൻ കൂട്ടുകെട്ടായി ഇവർ മാറി. 

വേൾഡ് റാലി ചാമ്പ്യൻഷിപ്പ് 2025–ലെ WRC3 വിഭാഗത്തിൽ ഇന്ത്യൻ മോട്ടോർസ്പോർട്സ് ആഗോള വേദിയിൽ ശ്രദ്ധിക്കപ്പെടുന്ന തരത്തിലുള്ള ചരിത്ര നേട്ടമാണ് ഈ സഖ്യം കുറിച്ചത്.

41 ടീമുകൾ പങ്കെടുത്ത റാലിയിൽ 4 മണിക്കൂർ, 28 മിനിറ്റ്,58 സെക്കൻഡ് സമയത്തിൽ ഈ സഖ്യം  മത്സരം പൂർത്തിയാക്കി. കെനിയയിലെ നൈറോബി ആസ്ഥാനമാക്കി പ്രവർത്തിക്കുന്ന ആഫ്രിക്ക ഇക്കോ സ്‌പോർട്സ് തയ്യാറാക്കിയ ഫോർഡ് ഫിയസ്റ്റ റാലി-3 കാർ ഉപയോഗിച്ചാണ് ഇവർ മത്സരത്തിനിറങ്ങിയത്.  

  ഹ്യൂണ്ടായ്, ടൊയോട്ട, എം–സ്പോർട്ട് ഫോർഡ് തുടങ്ങിയ ഫാക്ടറി ടീമുകളുടെ ശക്തമായ റാലി 1, റാലി 2 കാറുകൾ നിറഞ്ഞ മത്സരമേഖലയിൽ ഈ നേട്ടം കൊയ്യാൻ സാധിച്ചുവെന്നത് ഈ വിജയത്തിന് തിളക്കം പകരുന്നു.

WRC–യിലെ ഏതൊരു വിഭാഗത്തിലും ഒരു ഇന്ത്യൻ ഡ്രൈവർ –കോ ഡ്രൈവർ കൂട്ടുകെട്ടിന് ആദ്യമായാണ് പോഡിയം ലഭിക്കുന്നത്.

ഗൗരവ് ഗിൽ പോലുള്ള മുൻ ഇന്ത്യൻ താരങ്ങൾ വിദേശ കോ–ഡ്രൈവർമാരുമായി മത്സരിച്ചപ്പോഴേക്കാൾ വ്യത്യസ്തമായി, പുലിഗില്ല–ഷെരീഫ് കൂട്ടുകെട്ട് 17 കഠിന സ്പെഷൽ സ്റ്റേജുകളിലൂടെയും സാഹസികത നിറഞ്ഞ വഴികളിലൂടെയും മാറിമാറുന്ന മണൽതിട്ടകളിലൂടെയും തകർന്ന മരുഭൂമി ട്രാക്കുകളിലൂടെയും ചീറിപാഞ്ഞാണ് വിജയം കൈവരിച്ചത്.

33 വർഷത്തിലേറെ റാലി പരിചയമുള്ള മൂസ ഷരീഫ് ഈ വിജയത്തിൽ മുഖ്യപങ്ക് വഹിച്ചു.

വേഗത്തിൽ മാറിമാറിയുന്ന മരുഭൂമി ഭൂപ്രകൃതിയിൽ കൃത്യവും സ്ഥിരതയയുമാർന്ന  നാവിഗേഷന് ഏറെ പ്രാധാന്യമുണ്ട്. ആ ഉത്തരവാദിത്തം കൃത്യമായി നിർവഹിക്കാൻ മൂസാ ഷരീഫിന് സാധിച്ചു.

ഇന്ത്യക്കായി ഒരു WRC പോഡിയം നേടാനായതിൽ അതിയായ സന്തോഷമുണ്ടെന്നും  ലോക വേദിയിൽ ഇന്ത്യൻ ടീമുകൾക്കും മത്സരിക്കാനാകുമെന്നതിന്റെ ഉത്തമ തെളിവാണ് സൗദി റാലിയിലെ മിന്നുംവിജയമെന്നും   മൂസാ ഷരീഫ് പറഞ്ഞു.