മംഗളൂരു മുണ്ട ബീച്ചിൽ എട്ടംഗസംഘം ഒഴുക്കിൽെപട്ടു; ഒരാൾ മരിച്ചു, ഒരാളെ കാണാതായി
ബംഗളൂരു(www.truenewsmalayalam.com 09 JANUARY 2021): മംഗളൂരു മുണ്ട ബീച്ചിൽ ഒഴുക്കിൽ പെട്ട എട്ടംഗസംഘത്തിലെ ഒരാൾ മരിച്ചു. ആറുപേരെ നാട്ടുകാർ രക്ഷപ്പെടുത്തി. കാണാതായ മറ്റൊരാൾക്കായി തെരച്ചിൽ തുടരുകയാണ്. ഞായറാഴ്ചയാണ് സംഭവം. ഹാലങ്ങാടി തേക്കൂർ സ്വദേശി സുന്ദർ (45) ആണ് മരിച്ചത്. ഇയാളുടെ ബന്ധു ദാമോദർ (55) എന്നയാളെയാണ് കാണാതായത്.
നാല് പുരുഷന്മാരും നാല് സ്ത്രീകളുമടങ്ങുന്ന സംഘമാണ് ഞായറാഴ്ച ബീച്ചിലെത്തിയത്. പ്രദേശത്തുണ്ടായിരുന്ന മത്സ്യത്തൊഴിലാളികൾ ഇവർക്ക് മുന്നറിയിപ്പ് നൽകിയിരുന്നെങ്കിലും സംഘം അത് അവഗണിച്ചു. കടലിൽ കളിക്കവെ എല്ലാവരും ഒഴുക്കിൽപെട്ടു. സംഭവം കണ്ട നാട്ടുകാർ കുതിച്ചെത്തി ആറുപേരെ രക്ഷപ്പെടുത്തി കരക്കെത്തിച്ചു.
രക്ഷാപ്രവർത്തനത്തിൽ പങ്കെടുത്ത ചിലരും ആശുപത്രിയിലാണ്. സൂറത്ത്കൽ പോലീസ് സംഭവസ്ഥലത്തെത്തി കേസെടുത്ത് അന്വേഷണമാരംഭിച്ചു.
Post a Comment