പ്രശസ്ത ഗായകൻ എസ് പി ബാലസുബ്രഹ്മണ്യം അന്തരിച്ചു
ചെന്നൈ(True News 25.09.2020):സംഗീതം കൊണ്ട് വിസ്മയം തീർത്ത എസ് പി ബി വിടചൊല്ലി. അതിരുകളും സംസ്കാരങ്ങളും ഭാഷയുമെല്ലാം തന്റെ മാന്ത്രിക ശബ്ദത്തിൽ അലിയിച്ചു കളഞ്ഞ ആ അനുഗൃഹീത സ്വരധാര നിലച്ചു. തെക്കും വടക്കുമെന്ന ഭേദമില്ലാതെ രാജ്യം മുഴുവൻ പാട്ടിന്റെ പാലാഴിയൊരുക്കിയ സംഗീത മാന്ത്രികൻ എസ്.പി. ബാലസുബ്രഹ്മണ്യം ഒടുവിൽ മരണത്തിന് കീഴടങ്ങി. 'എസ്.പി.ബി' എന്ന ചുരുക്കപ്പേരിൽ ഇന്ത്യയുടെ മനസ്സുകീഴടക്കിയ ശ്രീപതി പണ്ഡിതാരാധ്യുല ബാലസുബ്രഹ്മണ്യം എന്ന എസ്.പി. ബാലസുബ്രഹ്മണ്യം ആരാധകരുടെയും സംഗീത പ്രേമികളുടെയും അകമഴിഞ്ഞ പ്രാർഥനകൾ വിഫലമാക്കി അരങ്ങൊഴിയുന്നത് 74ാം വയസ്സിൽ.
സമയവും കാലവും കീഴടക്കിയ സ്വരമാധുരിയിൽ അര നൂറ്റാണ്ടിലേറെയായി കലാപ്രേമികളെ ആസ്വാദ്യതയുടെ ഉത്തുംഗതയിലെത്തിച്ച സംഗീത ചക്രവർത്തിയുടെ വിടവാങ്ങൽ രാജ്യത്തിന്റെ ദുഃഖമായി. കോവിഡ് ബാധിതനായി ചെന്നൈയിലെ എം.ജി.എം ഹെൽത്ത് കെയറിൽ അതിതീവ്ര പരിചരണ വിഭാഗത്തിൽ ചികിത്സയിലിരിക്കേയാണ് ഉച്ചക്ക് 1.04നായിരുന്നു അന്ത്യം. മരണ വിവരം മകൻ എസ്.പി.ബി ചരൺ ആണ് മാധ്യമങ്ങളെ അറിയിച്ചത്.
അദ്ദേഹത്തിന്റെ അസുഖം മൂർച്ഛിച്ചതിനെ തുടർന്ന് സിനിമ താരങ്ങളടക്കം ആകുലപ്പെട്ടിരുന്നു.നടൻ കമൽ ഹാസൻ ഇന്ന് രാവിലെ അദ്ദേഹത്തെ സന്ദർശിച്ചിരുന്നു എന്ന് റിപോർട്ടുകൾ പറയുന്നു.
Post a Comment