കേരളത്തിൽ വന്ദേഭാരതിൽ ലാഭം 25 മിനിറ്റ് മുതൽ രണ്ട് മണിക്കൂർ വരെ മാത്രം; ടിക്കറ്റ് നിരക്ക് ആറിരട്ടിയിലേറെ.
മണിക്കൂറില്‍ 160 കിലോമീറ്ററാണ് രാജ്യത്തെ വന്ദേ ഭാരതിന്റെ പ്രഖ്യാപിത വേഗത. എന്നാൽ 500 കി.മീ ദൈർഘ്യമുള്ള കണ്ണൂർ -തിരുവനന്തപുരം റൂട്ട് പിന്നിടാൻ വന്ദേ ഭാരതിന് 7.30 മണിക്കൂർ എടുക്കുമെന്നാണ് ഇപ്പോൾ ലഭ്യമായ വിവരം. യാത്രാ ഷെഡ്യൂൾ റെയിൽവെ പുറത്തുവിട്ടാൽ മാത്രമേ ഇക്കാര്യം അന്തിമമായി പറയാൻ കഴിയൂ.
നിലവിൽ ലഭ്യമായ വിവരമനുസരിച്ച് ഈ റൂട്ടിൽ മണിക്കൂറിൽ ശരാശരി 66.66 കിലോമീറ്റർ വേഗതയിലാണ് വന്ദേ ഭാരത് സഞ്ചരിക്കുക. അതായത് പ്രഖ്യാപിത വേതയുടെ പകുതി പോലും ട്രെയിൻ കൈവരിക്കില്ല. വർഷങ്ങളായി രാജധാനി എക്സ്പ്രസ് ഈ റൂട്ടിൽ മണിക്കൂറിൽ 62.5 കി.മീ വേഗതയിൽ സഞ്ചരിക്കുമ്പോഴാണ്, അഡ്വാൻസ്ഡ് സെമി-സ്പീഡ് ട്രെയിൻ എന്ന് കൊട്ടിഘോഷിച്ച് കൊണ്ടുവരുന്ന വന്ദേ ഭാരത് ഇതിനോടടുത്ത വേഗതയിൽ മാത്രം സഞ്ചരിക്കുന്നത്.
നിലവിലുള്ള രാജധാനി എക്സ്പ്രസാവട്ടെ, 7.57 മിനുട്ട് കൊണ്ട് ഈ ദൂരം പിന്നിടുന്നുണ്ട്. ഗരീബ് രഥ് എക്സ്പ്രസ് 8.42 മണിക്കൂറും കണ്ണൂർ -തിരുവനന്തപുരം ജനശതാബ്ദി എക്സ്പ്രസ് 9.35 മണിക്കൂറുമാണ് ഈ ദൂരം പിന്നിടാൻ എടുക്കുന്ന സമയം.
ജനശതാബ്ദിയിൽ കണ്ണൂർ -തിരുവനന്തപുരം യാത്രക്ക് സെക്കൻഡ് സിറ്റിങ്ങിന് 220 രൂപയും എ.സി ചെയർ കാറിന് 755 രൂപയുമാണ് ടിക്കറ്റ് നിരക്ക്. എന്നാൽ, വന്ദേഭാരതിൽ ശരാശരി 1300 രൂപയും (എ.സി ചെയർ കാർ) 2400 രൂപയും (എക്സിക്യൂട്ടീവ് ചെയർ കാർ) നൽകേണ്ടി വരും.
മറ്റുസംസ്ഥാനങ്ങളിലെ വന്ദേ ഭാരത് വേഗത
ഡൽഹി -വാരണാസി റൂട്ടിൽ 770 കി.മീ. ദൂരം ഓടാൻ 8 മണിക്കൂർ മാത്രമാണ് വന്ദേഭാരത് എടുക്കുന്നത്. കേരളത്തിലേതിനേക്കാൾ 20 കി.മീ കൂടുതൽ ദൈർഘ്യമുള്ള ഗാന്ധിനഗർ-മുംബൈ റൂട്ടിലാകട്ടെ 6 മണിക്കൂർ 15 മിനിറ്റ് കൊണ്ടാണ് വന്ദേഭാരത് 520 കിലോമീറ്റർ പിന്നിടുന്നത്.
ടിക്കറ്റ് നിരക്ക് 1,300 / 2,400 രൂപ ?
എസി ചെയർ കാർ, എക്സിക്യൂട്ടീവ് ചെയർ കാർ എന്നിങ്ങനെ രണ്ട് ക്ലാസുകളാണ് വന്ദേഭാരതിലുള്ളത്. ഗാന്ധിനഗർ-മുംബൈ സെൻട്രൽ വന്ദേ ഭാരത് എക്സ്പ്രസിൽ കിലോമീറ്ററിന് എസി ചെയർ കാറിൽ 2.53രൂപയും എക്സിക്യൂട്ടീവ് ചെയർ കാറിൽ 4.64 രൂപയും നൽകണം. 520 കിലോമീറ്റർ ദൈർഘ്യമുള്ള ഈ റൂട്ടിൽ എസി ചെയർ കാറിന് 1,320 രൂപയും എക്സിക്യൂട്ടീവ് ചെയർ കാറിന് 2,415 രൂപയുമാണ് ടിക്കറ്റ് നിരക്ക്. ഏതാണ്ട് ഇതേ ദൂരമുള്ള കേരളത്തിൽ കണ്ണൂർ -തിരുവനന്തപുരം യാത്രക്ക് ഇതേ നിരക്ക് തന്നെയാവും ഈടാക്കുക. നേരിയ ഏറ്റക്കുറച്ചിൽ മാത്രമേ പ്രതീക്ഷിക്കേണ്ടതുള്ളൂ.
ന്യൂഡൽഹി -വാരണാസി വന്ദേ ഭാരത് എക്സ്പ്രസിൽ എസി ചെയർ കാർ ടിക്കറ്റിന് 1,670 രൂപയും എക്സിക്യൂട്ടീവ് ചെയർ കാർ ടിക്കറ്റിന് 3,075 രൂപയുമാണ് നിരക്ക്. അതായത് യഥാക്രമം കിലോമീറ്ററിന് 2.16 രൂപയും 3.99 രൂപയും നൽകണം. കാൺപൂർ, പ്രയാഗ്രാജ് എന്നീ രണ്ട് സ്റ്റേഷനുകളിൽ മാത്രമാണ് ഈ ട്രെയിൻ നിർത്തുന്നത്.
2019 ഒക്ടോബർ 3 ന് ന്യൂഡൽഹി റെയിൽവേ സ്റ്റേഷനിൽ നിന്ന് കേന്ദ്ര ആഭ്യന്തര മന്ത്രി അമിത് ഷാ ഫ്ലാഗ് ഓഫ് ചെയ്ത ഡൽഹി-കത്ര വന്ദേ ഭാരത് എക്സ്പ്രസ് ട്രെയിൻ 8 മണിക്കൂറിനുള്ളിൽ 650 കി.മീറ്ററാണ് പിന്നിടുന്നത്. ന്യൂഡൽഹി റെയിൽവേ സ്റ്റേഷനിൽ നിന്ന് രാവിലെ 6 മണിക്ക് പുറപ്പെട്ട് ഉച്ച രണ്ട് മണിക്ക് കത്രയിൽ എത്തിച്ചേരും. അംബാല കാന്റ്, ലുധിയാന, ജമ്മു താവി എന്നീ മൂന്ന് സ്റ്റേഷനുകളിൽ മാത്രമാണ് സ്റ്റോപ്പ്.
ദക്ഷിണേന്ത്യയിലെ ആദ്യത്തേതും രാജ്യത്തെ അഞ്ചാമത്തേതുമായ ചെന്നൈ-മൈസൂർ വന്ദേ ഭാരത് എക്സ്പ്രസ് ട്രെയിനിന് കാട്പാടിയിലും കെആർഎസ് ബെംഗളൂരുവിലുമായി രണ്ട് സ്റ്റോപ്പുകൾ ഉണ്ട്. ചെന്നൈയിൽ നിന്ന് പുലർച്ചെ 5:50 ന് പുറപ്പെട്ട് ഉച്ചയ്ക്ക് 12:20 നാണ് മൈസൂരുവിലെത്തുക. 6.30 മണിക്കൂറാണ് യാത്രാ സമയം. എസി ചെയർ കാർ ടിക്കറ്റിന് 1,270 രൂപയും എക്സിക്യൂട്ടീവ് ചെയർ കാറിന് 2,290 രൂപയുമാണ് നിരക്ക്.
രാജ്യത്ത് സര്‍വിസ് ആരംഭിച്ച ആദ്യ 10 വന്ദേ ഭാരത് എക്‌സ്പ്രസുകൾ:
ന്യൂഡല്‍ഹി-വാരണാസി ജംഗ്ഷന്‍ വന്ദേ ഭാരത് എക്സ്പ്രസ്
ന്യൂഡല്‍ഹി-ശ്രീ മാതാ വൈഷ്‌ണോ ദേവി കത്ര വന്ദേ ഭാരത് എക്സ്പ്രസ്
മുംബൈ സെന്‍ട്രല്‍-ഗാന്ധിനഗര്‍ തലസ്ഥാനമായ വന്ദേ ഭാരത് എക്സ്പ്രസ്
ന്യൂഡല്‍ഹി-അംബ് അന്ദൗര വന്ദേ ഭാരത് എക്സ്പ്രസ്
എംജിആര്‍-ചെന്നൈ സെന്‍ട്രല്‍-മൈസൂരു ജംഗ്ഷന്‍ വന്ദേ ഭാരത് എക്സ്പ്രസ്
ബിലാസ്പൂര്‍ ജംഗ്ഷന്‍-നാഗ്പൂര്‍ ജംഗ്ഷന്‍ വന്ദേ ഭാരത് എക്സ്പ്രസ്
ഹൗറ ജംഗ്ഷന്‍-പുതിയ ജല്‍പായ്ഗുരി ജംഗ്ഷന്‍ വന്ദേ ഭാരത് എക്സ്പ്രസ്
വിശാഖപട്ടണം ജംഗ്ഷന്‍-സെക്കന്തരാബാദ് ജംഗ്ഷന്‍ വന്ദേ ഭാരത് എക്സ്പ്രസ്
ഛത്രപതി ശിവജി മഹാരാജ് ടെര്‍മിനസ്-സോളാപൂര്‍ വന്ദേ ഭാരത് എക്സ്പ്രസ്
ഛത്രപതി ശിവജി മഹാരാജ് ടെര്‍മിനസ്-സായ്‌നഗര്‍ ഷിര്‍ദി വന്ദേ ഭാരത് എക്സ്പ്രസ്
വേഗത കുറയാനുള്ള കാരണങ്ങൾ:
തിരുവനന്തപുരത്തിനും കണ്ണൂരിനുമിടയിൽ റെയിൽ പാതയിലുള്ള 626 വളവുകളാണ് വേഗത കുറയാനുള്ള പ്രധാന കാരണം. കൂടാതെ കാലപ്പഴക്കം ചെന്ന പാലങ്ങളും വില്ലനാണ്. ഓട്ടോമാറ്റിക് സിഗ്നലിങ് സംവിധാനവും വേഗത കൈവരിക്കാൻ അനിവാര്യമാണ്.
മൊത്തം പാതയുടെ 36 ശതമാനവും വളവുകളാണ്. വളവുകൾ നിവർത്താനും വേഗം വർധിപ്പിക്കാനും ദക്ഷിണ റെയിൽവേ നടപടി തുടങ്ങിയെങ്കിലും എങ്ങുമെത്തിയിട്ടില്ല. എറണാകുളം -ഷൊർണൂർ സെക്ഷനിൽ 80 കിലോമീറ്ററിലേ ഓടൂ. തിരുവനന്തപുരം-എറണാകുളം കായംകുളം വഴി 100 കിലോമീറ്ററും കോട്ടയം വഴി 90 കിലോമീറ്ററും ആകും വേഗം. ഷൊർണൂർ-കണ്ണൂർ പാതയിൽ മാത്രമാണ് 110 കിലോമീറ്റർ വേഗത്തിലെങ്കിലും ഓടുക.
Post a Comment