രാത്രി കർഫ്യൂ ; ഞായറാഴ്ച രാത്രി പിടിയിലായത് 200 പേർ, 90 വാഹനങ്ങൾ കസ്റ്റഡിയിൽ

മംഗളൂറു: മുൻകരുതൽ നടപടിയെന്ന നിലയിൽ മംഗളൂറു നഗരത്തിൽ 200 ഓളം പേരെ പോലീസ് കസ്റ്റഡിയിലെടുത്തു. ഞായറാഴ്ച രാത്രി ജാഗ്രതാ വേളയിൽ വിവിധ സ്ഥലങ്ങളിലായി 90 ഓളം വാഹനങ്ങളും പിടിച്ചെടുത്തു.

മസൂദ്, പ്രവീൺ നെട്ടാരെ, മുഹമ്മദ് ഫാസിൽ എന്നിവരുടെ കൊലപാതക പരമ്പരകളെ തുടർന്ന് ജില്ലാ ഭരണകൂടം നഗരത്തിൽ കനത്ത ജാഗ്രത പുലർത്തുന്നുണ്ട്.

വിവിധ സ്ഥലങ്ങളിലെ 19 ചെക്ക്‌പോസ്റ്റുകളിൽ പോലീസിനെ നിയമിച്ചതോടെ നഗരത്തിൽ നിരോധനാജ്ഞകൾ കർശനമാക്കുകയും നടപ്പിലാക്കുകയും ചെയ്തിട്ടുണ്ട്. ഈ ചെക്‌പോസ്റ്റുകളിലൂടെ കടന്നുപോകുന്ന വാഹനങ്ങളുടെ പരിശോധന ശക്തമാക്കുകയും നഗരത്തിൽ അനിഷ്ട സംഭവങ്ങൾ ഉണ്ടാകാതിരിക്കാൻ കർശന നിരീക്ഷണം ഏർപ്പെടുത്തുകയും ചെയ്തിട്ടുണ്ട്. ഓഗസ്റ്റ് 3 രാവിലെ വരെ രാത്രി കർഫ്യൂ പ്രാബല്യത്തിൽ തുടരും. ഈ കാലയളവിൽ കടകളും വ്യാപാര സ്ഥാപനങ്ങളും വൈകുന്നേരം 6 മുതൽ രാവിലെ 6 വരെ അടച്ചിടണം.
പിടിച്ചെടുത്ത വാഹനങ്ങൾ തിങ്കളാഴ്ച പരിശോധിച്ച ശേഷം ഉടമകൾക്ക് വിട്ടുനൽകാനാണ് പോലീസ് സാധ്യത.