മോദിയുടെ അമ്മ ഹീരാ ബെൻ അന്തരിച്ചു; പ്രധാനമന്ത്രി അഹമ്മദാബാദിലേക്ക് തിരിച്ചു

 ന്യൂഡൽഹി: പ്രധാനമന്ത്രി നരേന്ദ്ര മോദിയുടെ അമ്മ ഹീരാ ബെൻ (100) അന്തരിച്ചു. വാർധക്യസഹജമായ അസുഖങ്ങളെ തുടർന്ന് അഹമ്മദാബാദിലെ സ്വകാര്യ ആശുപത്രിയിൽ ചികിത്സയിൽ കഴിയുന്നതിനിടെയാണ് അന്ത്യം. കഴിഞ്ഞ ദിവസമാണ് ഹീരാ ബെന്നിനെ ആശുപത്രിയിൽ പ്രവേശിപ്പിച്ചത്.

അഹമ്മദാബാദിലെ യുഎൻ മേത്ത ഇൻസ്റ്റിറ്റ്യൂട്ട് ഓഫ് കാർഡിയോളജി ആൻഡ് റിസർച് സെന്ററിൽ ഇന്ന് പുലർച്ചെയാണ് അന്ത്യം സംഭവിച്ചത്. ആരോഗ്യനില മോശമായതോടെ ചൊവ്വാഴ്ച രാത്രിയാണ് ഹീരാ ബെന്നിനെ ആശുപത്രിയിൽ പ്രവേശിപ്പിച്ചത്. മാതാവിൻ്റെ മരണവിവരമറിഞ്ഞ പ്രധാനമന്ത്രി മോദി അഹമ്മദാബാദിലേക്ക് തിരിച്ചു.

അമ്മയുടെ വിയോഗവിവരം അറിഞ്ഞ പ്രധാനമന്ത്രി മോദി ട്വിറ്ററിലൂടെ അനുസ്മരണ കുറിപ്പ് പങ്കുവച്ചു. ഒരു സന്യാസിയുടെ യാത്രയും നിസ്വാർഥ കർമയോഗിയുടെ പ്രതീകവും മൂല്യങ്ങളോട് പ്രതിബൻദ്ധതയുള്ള ജീവിതവും ഉൾക്കൊള്ളുന്ന ആ ത്രീത്വം അമ്മയാൽ എനിക്ക് ഇപ്പോഴും അനുഭവപ്പെടുന്നുണ്ട്. നൂറാം ജന്മദിനത്തിൽ ഞാൻ കണ്ട് മുട്ടിയപ്പോൾ അവർ ഒരു കാര്യം പറഞ്ഞത് ഇപ്പോഴും ഓർക്കുന്നു, ബുദ്ധിയോടെ പ്രവർത്തിക്കുക, ശുദ്ധിയോടെ ജീവിതം നയിക്കുക" - എന്നായിരുന്നുവെന്ന് മോദി ട്വിറ്ററിൽ കുറിച്ചു.

പ്രധാനമന്ത്രി ഡൽഹിയിൽ നിന്നും അഹമ്മദാബാദിലേക്ക് പോകുമെങ്കിലും മുൻ നിശ്ചയപ്രകാരമുള്ള അദ്ദേഹത്തിൻ്റെ ഔദ്യോഗിക പരിപാടികൾക്ക് മാറ്റമിലെന്ന് കേന്ദ്ര സർക്കാർ വൃത്തങ്ങൾ അറിയിച്ചു.