വിദ്യാലയങ്ങൾ തുറക്കുന്നു; വിദ്യാർഥികളുടെ ബസ് യാത്രാപ്രശ്നങ്ങൾ പരിഹരിക്കാൻ സ്റ്റുഡന്റ് ട്രാവൽ ഫെസിലിറ്റി കമ്മിറ്റി യോഗം തീരുമാനിച്ചു.
കർണാടകയിൽ പഠിക്കുന്ന വിദ്യാർഥികൾക്ക് യാത്രാ ഇളവ് അനുവദിക്കുന്നതിന് കളക്ടർ കെ.എസ്.ആർ.ടി.സി മാനേജിങ് ഡയറക്ടർക്ക് കത്തയക്കും. സ്കൂൾ ബസുകൾ എത്രയെണ്ണം പ്രവർത്തനക്ഷമമാണെന്നത് സംബന്ധിച്ച് റിപ്പോർട്ട് നൽകാൻ ആർ.ടി.ഒ.ക്കും വിദ്യാഭ്യാസ ഉപഡയറക്ടർക്കും നിർദേശം നൽകി. ജനപ്രതിനിധികളുടെ ഫണ്ടുപയോഗിച്ച് ആറുവർഷത്തിനുള്ളിൽ വാങ്ങിയ ബസുകൾ, അതിൽ എത്രയെണ്ണം ഓടുന്നുണ്ട്, അവശേഷിക്കുന്നവ എന്തുകൊണ്ട് ഓടുന്നില്ല എന്നത് സംബന്ധിച്ച വിശദമായ റിപ്പോർട്ട് കളക്ടർക്ക് മോട്ടോർ വാഹന വകുപ്പ് നൽകണം. എല്ലാ വിദ്യാലയങ്ങൾക്ക് മുന്നിലും പോലീസുകാരെ നിർത്താൻ നിലവിൽ സാധിക്കാത്ത സാഹചര്യത്തിൽ അതത് മാനേജ്‌മെന്റുകൾ ട്രാഫിക് ഗാർഡുമാരെ നിയമിക്കണം.
സ്കൂൾ തുറക്കുന്നതിനുമുൻപ് സ്വകാര്യ ബസുടമകളും വിദ്യാർഥിസംഘടനകളും പ്രത്യേക യോഗം ചേർന്ന് സൗഹാർദ അന്തരീക്ഷത്തിൽ പ്രവർത്തിക്കുമെന്ന് യോഗത്തിൽ ഉറപ്പുനൽകി. കളക്ടർ സ്വാഗത് ആർ.ഭണ്ഡാരി അധ്യക്ഷയായിരുന്നു. ആർ.ടി.ഒ. എ.കെ.രാധാകൃഷ്ണൻ, എൻഫോഴ്‌സ്‌മെന്റ് ആർ.ടി.ഒ. എം.ജെ.ഡേവിസ്, ഡി.ഡി.ഇ. കെ.വി.പുഷ്പ, കെ.ഗിരീഷ്, സത്യൻ പൂച്ചക്കാട്, ആൽബിൻ മാത്യു, ഹരിദാസ് പെരുമ്പള, ബി.നിതിൻകുമാർ, വിഷ്ണു മരക്കാപ്പ് എന്നിവർ പങ്കെടുത്തു.
Post a Comment