മീൻ ലോറിയിൽ കടത്തിയ 2 ക്വിന്റൽ കഞ്ചാവുമായി 4 പേർ അറസ്റ്റിൽ.

 

മംഗളൂരു: (www.truenewsmalayalam.com 27.05.2021) 

മീൻ ലോറിയിൽ കടത്തിയ 2 ക്വിന്റൽ കഞ്ചാവുമായി 4 പേർ അറസ്റ്റിൽ. കാസർകോട് സ്വദേശികളായ മുഹമ്മദ് ഫാറൂഖ്(24), മഞ്ചേശ്വരത്തെ മൊയ്തീൻ നവാസ്(34), മംഗളൂരു മുഡിപ്പുവിലെ മുഹമ്മദ് അൻസാർ(23), കുടക് കുശാൽനഗറിലെ സയ്യിദ് മുഹമ്മദ്(31) എന്നിവരെയാണ് അറസ്റ്റു ചെയ്തത്. കാസർകോട്, ദക്ഷിണ കന്നഡ, കുടക്, ഹാസൻ ജില്ലകളിൽ വിതരണത്തിനായി എത്തിച്ചതായിരുന്നു കഞ്ചാവ്. 4 വാളുകൾ, ഒരു കാർ, കഞ്ചാവു കടത്തിയ ലോറി, മൊബൈൽ ഫോണുകൾ, വൈഫൈ സെറ്റ് എന്നിവയും പിടിച്ചെടുത്തു.

മൂടബിദ്രി പൊലീസ് സ്റ്റേഷൻ പരിധിയിലെ ഒരു തട്ടിക്കൊണ്ടു പോകൽ കേസിന്റെ അന്വേഷണത്തിനിടെയാണ് കഞ്ചാവു കടത്തിനെ കുറിച്ചു പൊലീസിനു വിവരം ലഭിച്ചത്. ആന്ധ്രപ്രദേശ് വിശാഖപട്ടണത്തിനടുത്ത തോണി ആന്ധ്ര എന്ന സ്ഥലത്തു നിന്നാണു കഞ്ചാവ് കൊണ്ടു വന്നത്. പിടിയിലാകുന്നതിനു മുൻപ് ഇവർ വിവിധ സ്ഥലങ്ങളിൽ കഞ്ചാവ് വിതരണം ചെയ്തിട്ടുണ്ട്. സംഘത്തിൽ കൂടുതൽ പേരുണ്ടെന്നും  തിരച്ചിൽ നടക്കുകയാണെന്നും പൊലീസ് കമ്മിഷണർ എൻ.ശശികുമാർ, ഡിസിപി ഹരിറാം ശങ്കർ എന്നിവർ അറിയിച്ചു.