കൊടിയമ്മയിൽ മിനി മാസ്റ്റ് വിളക്കുകൾ കണ്ണടച്ചു; പ്രധാന ജങ്ഷനുകൾ ഇരുട്ടിൽ

കുമ്പള(www.truenewsmalayalam.com) : പ്രകാശം പരത്തേണ്ട മിനി മാസ്റ്റ് വിളക്കുകൾ കണ്ണടച്ചതോടെ കൊടിയമ്മയിലെ പ്രധാന ജങ്ഷനുകളിൽ കൂരിരുട്ട്.

കുമ്പള പഞ്ചായത്തിലെ കൊടിയമ്മ 9-ാം വാർഡിൽ കൊടിയമ്മ ഊജാറിലെ രണ്ടും യു.പി സ്കൂൾ പരിസരം, ചേപ്പിനടുക്കം ജുമാമസ്ജിദ് പരിസരം എന്നിവിടങ്ങളിലെ മിനിമാസ്റ്റ് വിളക്കുകൾ കത്താതായിട്ട് മാസങ്ങളായി.

നൂറ് കണക്കിന് ആളുകൾ എത്തുന്ന ഊജാർ ജങ്ഷനിലെ വിളക്കുകൾ കേടായതോടെ രാത്രിയിലെ കൂരിരുട്ടിൽ പ്രദേശവാസികൾ ഭീതിയിലാന്ന്.  

ഇവിടങ്ങളിൽ ഇരുട്ടിൻ്റെ മറവിൽ സാമൂഹ്യ ദ്രോഹികൾ തമ്പടിക്കുന്നതായി പരാതി ഉയർന്നിട്ടുണ്ട്.

അതിനിടെ ഊജാർ, പുളിക്കുണ്ട്, താഴെ കൊടിയമ്മ, ഇച്ചിലംപാടി, ചെങ്കിനടുക്ക എന്നീ ഭാഗങ്ങളിൽ നിരവധി തെരുവ് വിളക്കുകളും കണ്ണടച്ചു. 

കൊടിയമ്മ 9-ാം വാർഡിലെ തകരാറിലായ മുഴുവൻ മിനി മാസ്റ്റുകളും, തെരുവ് വിളക്കുകളും അടിയന്തിരമായും നന്നാക്കാൻ നടപടി സ്വീകരിക്കണമെന്ന് മുസ്ലിം ലീഗ് വാർഡ് കമ്മിറ്റി ആവശ്യപ്പെട്ടു. 

ഇതു സംബന്ധിച്ച് പഞ്ചായത്ത് അധികാരികൾക്ക് നിവേദനം നൽകിയതായി വാർഡ് മുസ് ലിം ലീഗ് പ്രസിഡൻ്റ് അബ്ദുല്ല ഇച്ചിലംപാടി, ജന.സെക്രട്ടറി ഐ.മുഹമ്മദ് റഫീഖ് എന്നിവർ അറിയിച്ചു.