സംസ്ഥാനത്ത ഡിറ്റെൻഷൻ സെന്റർ വരുന്നെന്ന പ്രചാരണം വാസ്തവ വിരുദ്ധം; പദ്ധതി തുടങ്ങിയത് മുൻ സർക്കാർ;ഈ സർക്കാർ വന്ന ശേഷം ഒരു തുടർനടപടിയും എടുത്തിട്ടില്ല;പ്രത്യേക സാഹചര്യത്തിൽ നടപടികൾ നിർത്തിവെക്കാൻ ഉത്തരവിറക്കും : പിണറായി വിജയൻ
തിരുവനന്തപുരം (True News, Dec27,2019): സംസ്ഥാനത്ത് തടങ്കൽ പാളയങ്ങൾ (ഡിറ്റെന്ഷന് സെന്ററുകള്) സ്ഥാപിക്കാന് സര്ക്കാര് പദ്ധതിയിടുന്നു എന്ന പ്രചാരണം വസ്തുതാവിരുദ്ധമാണെന്ന് മുഖ്യ മന്ത്രി പിണറായി വിജയൻ. ഇതുമായി ബന്ധപ്പെട്ട ഈ സർക്കാർ ഒരു നടപടിയും എടുത്തിട്ടില്ല, പദ്ധതി തുടങ്ങിയത് കഴിഞ്ഞ സർക്കാരാണെന്നും മുഖ്യ മന്ത്രി പറഞ്ഞു. പദ്ധതിയുടെ നാൾ വഴികൾ എണ്ണിപ്പറഞ്ഞുള്ള പത്രക്കുറിപ്പിലാണ് മുഖ്യമന്ത്രി ഇത് വ്യക്തമാക്കിയത്. 2012 മുതൽ ആരംഭിച്ച നടപടികൾ നിർത്തിവെക്കാൻ ഉത്തരവിടുമെന്നും ,മുഖ്യമന്ത്രി പറഞ്ഞു.
പത്രക്കുറിപ്പിന്റെ പൂർണ്ണ രൂപം
"ഏഴുവര്ഷം മുമ്പ് 2012 ഓഗസ്റ്റില് ഡിറ്റന്ഷന് സെന്റര് സ്ഥാപിക്കണം എന്ന് കേന്ദ്രസര്ക്കാര് എല്ലാ സംസ്ഥാനത്തെയും ആഭ്യന്തര സെക്രട്ടറിമാരെ കത്ത് മുഖേന അറിയിച്ചിരുന്നു. അനധികൃതമായി രാജ്യത്ത് പ്രവേശിക്കുകയോ, വിസ, പാസ്പോര്ട്ട് കാലാവധി തീര്ന്ന ശേഷവും അനധികൃതമായി രാജ്യത്ത് തുടരുകയോ ചെയ്യുന്ന വിദേശികളെയും, ശിക്ഷാ കാലാവധി പൂര്ത്തിയാക്കി അവരുടെ രാജ്യത്ത് തിരിച്ചുപോകുന്നതിനുള്ള നിയമനടപടികള്ക്കായി കാത്തിരിക്കുന്ന വിദേശികളെയും രാജ്യം വിടുന്നതുവരെയും നിരീക്ഷണത്തില് പാര്പ്പിക്കാന് ഇത്തരം സെന്റര് സ്ഥാപിക്കണമെന്നാണ് കേന്ദ്രം ആവശ്യപ്പെട്ടത്. ഇതിനായുള്ള പ്രൊപ്പോസല് സമര്പ്പിക്കണമെന്നാണ് കത്തിന്റെ ഉള്ളടക്കം.
ഈ കത്തിന്റെ അടിസ്ഥാനത്തില് 2015 നവംബര് നാലിന് ആഭ്യന്തര വകുപ്പ് യോഗം വിളിച്ചുചേര്ത്തിരുന്നു. യോഗത്തിന്റെ തീരുമാനപ്രകാരം സംസ്ഥാനത്ത് അടിയന്തരമായി അത്തരം സെന്ററുകള് സ്ഥാപിക്കാന് നിശ്ചയിച്ചു. അവ സാമൂഹിക നീതി വകുപ്പിന്റെ കീഴിലാവണമെന്നും ആവശ്യമായ കെട്ടിടം വകുപ്പ് കണ്ടെത്തണമെന്നും പ്രവര്ത്തനത്തിനാവശ്യമായ സ്റ്റാഫിനെ പോലീസ് വകുപ്പ് നിശ്ചയിക്കണമെന്നും തീരുമാനിച്ചു. പോലീസ്-ജയില് വകുപ്പുകള്ക്ക് പുറത്താവണം അത്തരം സെന്ററുകള് സ്ഥാപിക്കേണ്ടത് എന്ന തീരുമാനം യോഗം കൈക്കൊണ്ടു.
ഡിറ്റന്ഷന് സെന്റര് സ്ഥാപിക്കുന്നതിനാവശ്യമായ ശുപാര്ശ സമര്പ്പിക്കാന് 2016 ഫെബ്രുവരി 29ന് സാമൂഹികനീതി വകുപ്പ് ഡയറക്ടറെ ചുമതലപ്പെടുത്തി. തുടര്ന്ന് പ്രസ്തുത ആവശ്യത്തിനായി സാമൂഹികനീതി ജില്ലാ ഓഫീസറും ജില്ലാ പോലീസ് സൂപ്രണ്ടും ചേര്ന്ന മാനേജിംഗ് കമ്മിറ്റിയെ ചുമതലപ്പെടുത്താമെന്നും നിശ്ചയിച്ചു. ഇത് സംബന്ധിച്ച് എത്രപേരെ പാര്പ്പിക്കേണ്ടിവരും എന്നതുള്പ്പെടെയുടെ വിവരങ്ങള് സാമൂഹികനീതി വകുപ്പ് ഡയറക്ടറോട് സെക്രട്ടറിയേറ്റിലെ സാമൂഹികനീതി വകുപ്പ് ആവശ്യപ്പെട്ടു. തുടര്ന്ന് ഈ വിശദാംശങ്ങള് സംസ്ഥാന ക്രൈം റെക്കോര്ഡ്സ് ബ്യൂറോയോടും ചോദിച്ചു. ഇതു സംബന്ധിച്ച ഒരു വിവരവും റെക്കോര്ഡ്സ് ബ്യൂറോ ഇതുവരെ നല്കിയിട്ടില്ല. നേരത്തെ അയച്ച കത്തുമായി ബന്ധപ്പെട്ട റിമൈന്ഡറുകള് തുടര്ച്ചയായി കേന്ദ്രസര്ക്കാരില് നിന്ന് വകുപ്പുകള്ക്ക് വരുന്നുണ്ട്.
ഇതു സംബന്ധിച്ച യാതൊരു ഫയലും ഈ സര്ക്കാരിന്റെ കാലത്ത് മന്ത്രിമാരാരും കണ്ടിട്ടില്ല. 2012 മുതല് മുന് സര്ക്കാര് ആരംഭിച്ച നടപടിക്രമങ്ങള് ഇന്നത്തെ സാഹചര്യം കണക്കിലെടുത്ത് നിര്ത്തിവയ്ക്കുന്നതിന് സര്ക്കാര് ഉത്തരവു നല്കുകയാണെന്നും വാര്ത്താ കുറിപ്പില് പറയുന്നു.
Post a Comment