ആധാർ – റേഷൻ കാർഡ് ബന്ധിപ്പിക്കാൻ ഒക്ടോബർ 31 വരെ നീട്ടി

തിരുവനന്തപുരം(True News 1 October 2019): റേഷൻ കാര്‍ഡ് ആധാറുമായി ബന്ധിപ്പിക്കാനുള്ള സമയപരിധി ഒക്ടോബര്‍ 31 വരെ സര്‍ക്കാര്‍ നീട്ടി നല്‍കി. സെപ്റ്റംബര്‍ 30 വരെയാണ് സര്‍ക്കാര്‍ സമയ പരിധി നല്‍കിയിരുന്നതെങ്കിലും ഇനിയും റേഷൻ കാര്‍ഡ് ആധാറുമായി ബന്ധിപ്പിക്കാത്ത 36.1 ലക്ഷത്തോളം കാര്‍ഡ് ഉടമകളുണ്ടെന്ന് കണ്ടെത്തിയതിനെ തുടര്‍ന്നാണ് സംസ്ഥാന സര്‍ക്കാര്‍ സമയ പരിധി നീട്ടിയത്. മന്ത്രി പി തിലോത്തമനാണ് ഇക്കാര്യം അറിയിച്ചത്. സിവിൽ സപ്ലൈസ് ഡയറക്ടര്‍ പുറത്തിറക്കിയ പത്രക്കുറിപ്പ് മന്ത്രി ഫേസ്ബുക്ക് പേജ് വഴി പങ്കുവെച്ചു.
റേഷൻ കടയിലെത്തി നേരിട്ടോ അക്ഷയകേന്ദ്രം വഴിയോ റേഷൻ കാര്‍ഡ് ആധാറുമായി ബന്ധിപ്പിക്കാം. www.civilsupplieskerala.gov.in എന്ന വെബ്സൈറ്റ് വഴിയും സേവനം ലഭ്യമാണ്. ഒക്ടോബര്‍ 31ന് ശേഷവും നടപടി പൂര്‍ത്തിയാക്കാത്തവര്‍ക്ക് റേഷൻ ലഭിക്കില്ലെന്നാണ് സംസ്ഥാന സര്‍ക്കാര്‍ അറിയിച്ചിട്ടുള്ളത്. അതേസമയം, റേഷൻ ഉത്പന്നങ്ങള്‍ ലഭിച്ചില്ലെങ്കിലും ആധാര്‍ ലിങ്ക് ചെയ്തില്ലെങ്കിൽ കാര്‍ഡിലെ പേര് നീക്കം ചെയ്യില്ല.
റേഷൻ കാര്‍ഡുടമയ്ക്ക് പുറമെ കാര്‍ഡിൽ പേരുള്ള എല്ലാ അംഗങ്ങളും ആധാര്‍ ബന്ധിപ്പിക്കണം. 2016ലെ ഭക്ഷ്യഭദ്രതാ നിയമത്തിൽ ആധാര്‍ റേഷൻ കാര്‍ഡുമായി ബന്ധിപ്പിക്കണമെന്ന് നിബന്ധനയുണ്ട്. റേഷൻ ഉത്പന്നങ്ങള്‍ യഥാര്‍ത്ഥ അവകാശിയ്ക്ക് തന്നെയാണ് ലഭിക്കുന്നതെന്ന് ഉറപ്പാക്കാനാണ് ഈ സംവിധാനം സര്‍ക്കാര്‍ ഏര്‍പ്പെടുത്തുന്നത്.
ആധാര്‍ റേഷൻ കാര്‍ഡുമായി ലിങ്ക് ചെയ്യാൻ റേഷൻ കടകളുമായി ബന്ധപ്പെടാം. റേഷൻ കടയിലെ ഇ-പോസ് മെഷീൻ വഴി ആധാര്‍ ലിങ്ക് ചെയ്യാൻ സാധിക്കും. ആധാര്‍ നമ്പറും ഫോൺ നമ്പറും ചേര്‍ക്കാനായി താലൂക്ക് സപ്ലൈ ഓഫീസിലോ സിറ്റി റേഷനിങ് ഓഫീസിലോ ആധാര്‍, റേഷൻ കാര്‍ഡുകളുമായി എത്തിയാൽ മതി. ഫോൺ നമ്പര്‍ കൂടി ലിങ്ക ചെയ്താൽ റേഷൻ വിഹിതം സംബന്ധിച്ച വിവരങ്ങള്‍ എസ് എം എസ് ആയും ലഭിക്കും.
www.civilsupplieskerala.gov.in എന്ന വെബ്സൈറ്റ് വഴി ഓൺലൈനായും വിവരങ്ങള്‍ ലിങ്ക് ചെയ്യാം. എന്നാൽ ഈ സംവിധാനം ഉപയോഗപ്പെടുത്താൻ റേഷൻ കാര്‍ഡിലെ ഒരംഗം എങ്കിലും നേരിട്ട് ആധാര്‍ ലിങ്ക് ചെയ്യേണ്ടതുണ്ട്.